आदिती अर्बन बँकेवर डल्ला मारणारे बँकेचेच कर्मचारी, बनावट सोने तारण कर्ज प्रकरण उघड होऊ नये म्हणून रचला होता बँक लुटण्याचा कट; पोलीस अधिक्षक अजयकुमार बन्सल यांची माहिती 

जालना । प्रतिनिधी - शहरातील जुना मोंढा परिसरात असलेल्या आदिती अर्बन को ऑपरेटीव्ह के्रडीट सोसायटी लि. बुलढाणा जालना शाखेच्या बाँकेचे शटर लॉक तोडुन लॉकरमधील 11 लाख 56 हजार रोख रक्कमेसह 19 लाख 76 हजार रुपये किमतीची ग्राहकांनी तारण ठेवलेले 247 ग्रॅम सोन्याचे दागिन्यांवर उल्ला मारणारे आरोपी हे बँकेतील कर्मचारी असल्याचे उघड झाले आहे. तीन्ही आरोपींना पोलीसांनी अटक केली असून या गुन्ह्याची त्यांनी कबुली दिली  असल्याची माहिती पोलीस अधिक्षक अजयकुमार बन्सल यांनी पोलीस अधिक्षक कार्यालयात सोमवार (दि 4) रोजी आयोजित पत्रकार परिषदेत दिली आहे. बनावट सोने तारण कर्ज प्रकरण उघड होऊ नये म्हणून त्यांनी बँक लुटण्याचा कट रचला असल्याचेही पोलीस अधिक्षक बन्सल यांनी यावेळी सांगितले.

आदिती अर्बन को ऑपरेटीव्ह क्रेडीट सोसायटी लि. बुलढाणा, शाखा-जालना ही बँक दिवाळी निमित्ताने सुटी असल्याने बंद होती. याचा फायदा घेत रविवार  (दि. 03) रोजी बँकेचे शटर लॉक तोडुन, लॉकरमधील रु.11,56,000/- रोख रक्कम व रु.19,76,000/- किमतीचे बँकेच्या ग्राहकांनी तारण ठेवलेले 247 ग्रॅम सोन्याचे दागिने चोरी झाल्याची तक्रार बैंक मॅनेजर प्रकाश आसाराम बाविस्कर, (रा.छत्रपती संभाजीनगर) यांनी दिनांक 03/11/2024 रोजी दिली. त्यानुसार मॅनेजर यांच्या फिर्यादीवरुन सदर बाजार पोलीस ठाणे, जालना येथे गुन्हा दाखल करण्यात आला आहे. 

वरिष्ठ पोलीस अधिकार्‍यांनी घटनास्थळाची पाहणी करुन गुन्हा उघडकीस आणण्याबाबत स्थानिक गुन्हे शाखा व सदर बाजार पोलीसांना सुचना दिल्या होत्या. अज्ञात आरोपितांचा शोध घेत असतांना बँकेत काम करणारा कर्मचारी रोखपाल गोवर्धन विष्णु सवडे (वय 22, रा. बाजीउम्रद ता.जि. जालना) यांच्याकडे गुन्ह्याच्या अनुषंगाने चौकशी करत असतांना गोवर्धन सवडे यांचे वर्तन संशयास्पद वाटल्याने त्यास विश्‍वासात घेऊन अधिक चौकशी केली असता त्यांनी व त्याचे साथीदार लक्ष्मण नारायण डोंगरे (वय 26 रा. मौजपुरी. ता.जि. जालना), जगदीश आनंता लोलेवार (वय 21, रा. लक्ष्मीनारायणपुरा, जालना) व अन्य एका साथीदाराच्या मदतीने गुन्ह केल्याची कबूली दिली. तीन्ही आरोपीतांना पोलीसांनी ताब्यात घेऊन चोरी करण्याचे कारण विचारले असता त्यांनी सांगितले की, तिघांनी संगनमत करुन बँकेमध्ये पाच बनावट सोने तारण ठेवून कर्ज घेतले होते. या कर्जाचे हफ्ते भरणे शक्य होत नसल्याने व कर्जाची रक्कम थकीत होत असल्ययाने सोने तारण कर्ज प्रकरण उघड होवू नये म्हणून त्यांनी बँक फोडण्याचा कट रचला व दि. 31 ऑक्टोबर 2024 रोजी बँकेतील रक्कम व सोने चोरी केले. दि. 1 नोव्हेंबर 2024 रोजी बँकेत अनार फटाका लावून लॉकर जाळण्याचा प्रयत्न केला. तसेच बँकेच्या शटरचे लॉक बाहेरुन तोडून आणून ते शटरच्या बाहेर ठेवून बँक फोडल्याचा बनाव केला असल्याचेही एसपी बन्सल यांनी यावेळी सांगितले. 

गुन्हयातील आरोपी नामे ।) गोवर्धन विष्णु सवडे, वय-22 वर्ष, व्यवसाय-रोखपाल, (कॅशिअर), रा. बाजीउम्रद, ता.जि. जालना 2) लक्ष्मण नारायण डोंगरे, वय-26 वर्ष, व्यवसाय-बैंक लिपीक, रा. मौजपुरी, ता.जि. जालना 3) जगदीश आनंता लोलेवार, वय-21 वर्ष, व्यवसाय-बँक शिपाई रा. लक्ष्मीनारायणपुरा, जालना यांच्या ताब्यातुन गुन्हयातील रोख रक्कम रु.9,93,000/- व रु.8,86,000/- किं. चे दागिने असा एकुण रु. 18,79,000/- किंमतीचा मुददेमाल जप्त करण्यात आला आहे.

ही कारवाई वरिष्ठ पोलीस अधिकार्‍यांच्या मार्गदर्शनाखाली सिध्दार्थ बारवाल, भा.पो.से., स्थानिक गुन्हे शाखेचे पोलीस निरीक्षक पंकज जाधव, सदर बाजार पोलीस ठाणेचे पोलीस निरीक्षक संदीप भारती, सपोनि. यागेश उबाळे, सपोनि. आनंदसिग साबळे, पोउपनि. शैलेश म्हस्के, स्था.गु.शा.चे पोउपनि, राजेंद्र वाघ, पोलीस अंमलदार रामप्रसाद पव्हरे, रमेश राठोड, प्रभाकर वाघ, गोपाल गोशिक, लक्ष्मीकांत आडेप, सागर बाविस्कर, सुधीर वाघमारे, दत्ता वाघुंडे, ईरशाद पटेल, सतिष श्रीवास, आकुर धांडगे, देविदास भोजने, व सदर बाजार पोलीस ठाणेचे पोलीस अंमलदार रामप्रसाद रंगे, जगन्नाथ जाधव, नजीर पटेल, अजीम शेख, दुर्गेश गोफणे, गणेश तेजनकर, राहुल कटकम, यांनी केली आहे.

स्थागुशाखेचे पंकज जाधव यांची थोपाटली पाठ
आदिती अर्बन बँक गुन्हा प्रकरणातील आरोपींना अवघ्या तीन ते चार तासात ताब्यात घेतल्याबद्दल पोलीस अधिक्षक अजयकुमार बन्सल यांनी स्थानिक गुन्हे शाखेचे पोलीस निरीक्षक पंकज जाधव यांच्यासह पथकातील अधिकारी-कर्मचार्‍यांंची स्तुती करत शाबासकी दिली. त्यांना या गुन्ह्याची उकल केल्याप्रकरणी रिवार्ड, प्रमाणपत्र देण्यात येणार असल्याचेही एसपी बन्सल यांनी सांगितले. 

सीसीटीव्ही; ऑनलाईन बॅकअपची व्यवस्था करा; बँकांना पोलीस अधिक्षकांचे आवाहन 
आदिती अर्बन बँके प्रकरणात आरोपीतांना बँकेतील सीसीटीव्हीसाठी असलेला डिव्हीआर गायब केला. डिव्हीआर गायब केल्याने तपासात अडचणी निर्माण होतात. त्यामुळे अर्बन बँक, पतसंस्था व इतरांनी सीसीटीव्ही लावल्यानंतर ऑनलाईन बॅकअपची व्यवस्था करावी असे आवाहन यावेळी पोलीस अधिक्षक अजयकुमार बन्सल यांनी केले आहे. किमान गेल्या चार-पाच दिवसांचे अथवा आठवडाभराचे ऑनलाईन बॅकअपची व्यवस्था झाल्यास डिव्हीआर चोरी केल्यास अथवा डॅमेज केल्यास ऑनलॉईन बॅकअपमुळे चोरट्यांचा शोध घेणे सोपे होईल. यासंदर्भात बँक मॅनेजर व व्यापार्‍यांना या ऑनलाईन बॅकअप बाबत अवगत करण्यात येणार असल्याचेही श्री बन्सल यांनी पत्रकार परिषदेत सांगितले.